རྒྱ་གར་ཧི་མ་ཅལ་མངའ་སྡེའི་ཀང་ར་རྫོང་ཁོངས། དྷ་རམ་ས་ལ་ཐེག་ཆེན་ཆོས་གླིང་དུ་འབོད་པའི་ས་གནས་འདིར། གཙུག་ལག་ཁང་རྟེན་དང་བརྟེན་པར་བཅས་པ་གསར་དུ་བཞེངས་པའི་རྒྱུ་མཚན་རགས་རིམ་བཀོད་པར། རྒྱུ་རྐྱེན་ནི། འགྲོ་བ་མིས་མཚོན་པའི་སེམས་ཅན་ཡིན་ནོ་ཅོག་བདེ་བ་འདོད་པ་དང༌། སྡུག་བསྔལ་མི་འདོད་པ་ཤ་སྟག་ཡིན་ལ། བདེ་སྡུག་གཉིས་རྒྱུ་རྐྱེན་ལ་བརྟེན་ནས་འབྱུང་བས་བདེ་བ་འདོད་པས་དེའི་རྒྱུ་སྒྲུབ་དགོས་པ་དང༌། སྡུག་བསྔལ་མི་འདོད་པས་དེའི་རྒྱུ་སྤོངས་དགོས་ཤིང༌། བདེ་སྡུག་གི་མཐར་ཐུག་པའི་གཙོ་བོའི་རྒྱུ་རྐྱེན་སེམས་དུལ་མ་དུལ་འདི་ལ་ཐུག་པས་བདེ་བ་འདོད་པ་དང་སྡུག་བསྔལ་མི་འདོད་པས་སེམས་འདུལ་བའི་ཐབས་ལ་འབད་དགོས།
