ནང་གི་རྩ་རླུང་ཐིག་ལེའི་ཉམས་ལེན་གཉིས།
གཞན་ཡང་སྨིན་བྱེད་དབང་དང་གྲོལ་བྱེད་ཀྱི། །
བསྐྱེད་རྫོགས་ལམ་གཉིས་གྲོལ་འབྲས་ཨེ་མ་མཚར། །
ཞེས་མཆོད་པར་བརྗོད་པ་སྔོན་དུ་བཏང་སྟེ། རྒྱུད་སྡེ་གཞན་དང་བཤད་སྲོལ་མི་མཚུངས་པའི་ཐུན་མོང་མ་ཡིན་པའི་བཅོམ་ལྡན་འདས་དཔལ་དུས་ཀྱི་འཁོར་ལོའི་སྐོར་ཅུང་ཟད་ངོ་སྤྲོད་ཞུ་བ་ལ།
དང་པོ། གང་དུ་གསུངས་པའི་གནས་ནི། ྋརྒྱལ་མཆོག་བསྐལ་བཟང་རྒྱ་མཚོས་མཛད་པའི་དུས་འཁོར་བརྒྱུད་འདེབས་ལས།
སྒྲིབ་བྲལ་སྐུ་བཞིའི་གོ་འཕང་མཆོག་བརྙེས་ནས། །
ལྷོ་ཕྱོགས་དཔལ་ལྡན་འབྲས་སྤུངས་མཆོད་རྟེན་ཆེར། །
རྒྱུད་ཀུན་གསུང་མཛད་དང་པོའི་སངས་རྒྱས་ལ། །
གསོལ་བ་འདེབས་སོ་དངོས་གྲུབ་རྣམ་གཉིས་སྩོལ། །
ཞེས་གསུངས་པ་ལྟར། བདག་ཅག་གི་སྟོན་པ་མཉམ་མེད་ཤཱཀྱ་སེང་གེས་དམ་པའི་ཆོས་ཀྱི་འཁོར་ལོ་རྒྱ་ཆེར་བསྐོར་བར་མཛད་པའི་ནང་ནས། རྒྱུད་ཀྱི་རྒྱལ་པོ་བཅོམ་ལྡན་འདས་དཔལ་དུས་ཀྱི་འཁོར་ལོའི་རྩ་རྒྱུད་ཐོག་མར་གསུངས་པའི་གནས་ནི། རྒྱ་གར་ལྷོ་ཕྱོགས་དཔལ་གྱི་རི་དང་ཉེ་བའི་གནས་དཔལ་ལྡན་འབྲས་སྤུངས་མཆོད་རྟེན་དུ་གསུངས་པ་ཞིག་ཡིན།
དཔལ་ལྡན་འབྲས་སྤུངས་མཆོད་རྟེན་ནི། རྒྱ་གར་ལྷོ་ཕྱོགས་དཔལ་རི་དང་ཉེ་བར་དྷ་ན་ཤྲིའའི་གླིང་དུ་ཆགས་ཤིང༌། དེ་ནི་སངས་རྒྱས་རབ་བདུན་ལས་ཚེ་ལོ་གསུམ་ཁྲིའི་དུས་སུ་སངས་རྒྱས་གསེར་ཐུབ་འཇིག་རྟེན་དུ་བྱོན་སྐབས་མུ་གེས་ཉམ་ཐག་པའི་སེམས་ཅན་རྣམས་ལ་ཕན་ཕྱིར་དགེ་སློང་ཞིག་གིས་ཉིན་ལམ་བཅུ་གཉིས་ཀྱི་སར་འབྲས་སོ་བའི་ཆར་ཕབ་ནས་སེམས་ཅན་རྣམས་ཚིམ་པར་བྱས་པའི་འབྲས་ལྷག་རྫུ་འཕྲུལ་གྱིས་བསྡུས་ཏེ་མཆོད་རྟེན་ཆེན་པོ་ཞིག་བཞེངས་པ་ལ་བརྟེན་ནས་འབྲས་སྤུངས་མཆོད་རྟེན་ཞེས་མཚན་ཐོགས་པར་གྲགས།
གཉིས་པ། དུས་ཀྱི་འཁོར་ལོའི་རྒྱུད་དུས་ནམ་ཞིག་གསུངས་སམ་ཞེ་ན།
རྒྱུད་སྡེ་གཞན་དང་བཤད་སྲོལ་མི་མཚུངས་པའི་བཅོམ་ལྡན་འདས་དཔལ་དུས་ཀྱི་འཁོར་ལོའི་རྒྱུད་ནི་སྟོན་པ་མཉམ་མེད་ཤཱཀྱའི་རྒྱལ་པོ་དགུང་གྲངས་ཉེར་དགུ་པར་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དང༌། དེ་ནས་ལོ་དྲུག་དཀའ་སྤྱད་མཛད་དེ་དགུང་གྲངས་སོ་ལྔར་མངོན་པར་རྫོགས་པའི་སངས་རྒྱས་ཤིང༌། དགུང་གྲངས་སོ་དྲུག་པ་སྟེ་སངས་རྒྱས་པའི་ཕྱི་ལོའི་ནག་པ་ཟླའི་ཉ་ལ་གསུངས་པར་བརྟེན་བོད་ཟླ་གསུམ་པའི་ཚེས་བཅོ་ལྔ་ཉིན་དུས་འཁོར་རྩ་བརྒྱུད་གསུངས་པའི་དུས་ཆེན་ཞེས་སྲུང་རྩི་གནང་ལམ་ཡོད།
དེ་ཡང་དགྲ་བཅོམ་པ་རབ་འབྱོར་སོགས་གདུལ་བྱ་ཐུན་མོང་བ་རྣམས་ཀྱི་ངོར་གནས་བྱ་རྒོད་ཕུང་པོའི་རིར་ཤེར་ཕྱིན་གྱི་མདོ་གསུངས་པ་དང༌། དེ་དང་དུས་མཉམ་དུ་ཤམ་བྷ་ལའི་ཆོས་རྒྱལ་ཟླ་བ་བཟང་པོ་སོགས་གསང་སྔགས་གྱི་གདུལ་བྱ་ཐུན་མོང་མ་ཡིན་པ་རྣམས་ཀྱི་ངོར་དཔལ་ལྡན་འབྲས་སྤུངས་མཆོད་རྟེན་དུ་དཔལ་དུས་ཀྱི་འཁོར་ལོའི་རྒྱུད་གསུངས་པ་ཡིན་ཏེ། དེ་ཡང་དུས་འཁོར་རྩ་རྒྱུད་ལས།
སྟོན་པས་བྱ་རྒོད་ཕུང་པོའི་རིར། །
ཤེས་རབ་ཕ་རོལ་ཕྱིན་ཚུལ་བཞིན། །
ཆོས་བསྟན་དཔལ་ལྡན་འབྲས་སྤུངས་སུ། །
དེ་བཞིན་གསང་སྔགས་ཚུལ་རབ་བསྟན། །
ཞེས་གསལ་བར་གསུངས་སོ།།
གསུམ་པ། དུས་འཁོར་གྱི་རྒྱུད་འདི་ཇི་ལྟར་གསུངས་པའི་ཚུལ་ནི།
མདོར་བསྡུས་དང་པོའི་འགྲེལ་པ་སྙིང་པོ་སྣང་བ་ལས། སྔོན་ཤམ་བྷ་ལའི་ཡུལ་ནས་རང་ཉིད་འོངས་ཏེ་ཟླ་བ་བཟང་པོ་ཉི་མའི་འོད་ཀྱི་ལྷ་མོ་རྣམ་པར་རྒྱལ་མའི་མངལ་ནས་བྱུང་བ་ཕྱག་ན་རྡོ་རྗེའི་སྤྲུལ་པའི་སྐུ་གྲོང་ཁྱེར་བྱེ་བ་ཕྲག་དགུ་བཅུ་རྩ་དྲུག་ན་གནས་པའི་རྒྱལ་པོ་རྣམས་ཀྱིས་རྗེས་སུ་བགྲོད་བཞིན་པས་དཔལ་ལྡན་འབྲས་སྤུངས་སུ་དཔལ་དུས་ཀྱི་འཁོར་ལོའི་རྒྱུད་བསྟན་པའི་ཆེད་དུ་དང༌། སེམས་ཅན་མཐའ་དག་གི་ཉེ་བའི་སྐལ་བ་དང་ལྡན་པ་ཉིད་དུ་མཐོང་ནས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བསྒྲུབ་པའི་དོན་དུ་གསོལ་བ་བཏབ་པ་ནི། ཞེས་གསུངས་ཤིང༌། མཚན་བརྗོད་འགྲེལ་པ་ཉི་མ་དཔལ་ཡེ་ཤེས་ཀྱིས་མཛད་པ་ལས་ཀྱང༌། འདིར་ངེས་པར་དཔལ་ལྡན་འབྲས་སྤུངས་རྒྱལ་བའི་མཆོད་རྟེན་ཆེན་པོར་སངས་རྒྱས་བཅོམ་ལྡན་འདས་ཤཱཀྱ་སེངྒེ་ཞེས་བྱ་བ་ལ་རྒྱུད་སྣ་ཚོགས་པ་ཉན་པར་འདོད་པ་རྣམས་ཀྱིས་གསོལ་བ་བཏབ་པས། དཔྱིད་ཟླ་འབྲིང་པོའི་ཉ་ལ་ཆོས་དབྱིངས་གསུང་གི་དབང་ཕྱུག་གི་དཀྱིལ་འཁོར་དང༌། དེའི་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་དང་པོའི་སངས་རྒྱས་རྣམ་པར་སྤྲོས་ནས། དེར་ཉི་མ་དེ་ཉིད་ལ་ལྷ་སོགས་གདུལ་བྱ་རྣམས་ལ་སངས་རྒྱས་ཀྱིས་དབང་བསྐུར་ནས། རྒྱས་པ་དང་བསྡུས་པའི་དབྱེ་བས་གསང་སྔགས་ཀྱི་ཚུལ་ཐམས་ཅད་བསྟན་ཏོ། །ཞེས་གསུངས་སོ།།
བཞི་པ། དུས་འཁོར་གྱི་རྒྱུད་འདི་གདུལ་བྱ་གང་ལ་གསུངས་སམ་ཞེ་ན། མདོར་བསྡུས་དང་པོའི་འགྲེལ་པར་རྩ་བའི་རྒྱུད་ཀྱི་ལུང་དྲངས་པ་ལས།
སྟོན་པ་གོའུ་ཏམ་སྟོན་པའོ། །
གནས་ནི་དཔལ་ལྡན་ཆོས་ཀྱི་དབྱིངས། །
འཁོར་ནི་བྱང་ཆུབ་སེམས་དཔའ་སོགས། །
མི་བདག་ཟླ་བཟང་ཞུ་བ་པོ། །
རྒྱུད་བསྟན་པ་ནི་མ་རྣམས་ཀྱི། །
བསོད་ནམས་ཡེ་ཤེས་དགོས་པ་ཅན། །
ཞེས་གསུངས་པ་ལྟར་སྟོན་པ་ཤཱཀྱ་ཐུབ་པ་དུས་ཀྱི་འཁོར་ལོའི་ཏིང་ངེ་འཛིན་ལ་སྙོམས་པར་བཞུགས་པས། དཀྱིལ་འཁོར་ལ་བཀོད་པའི་འཁོར་སངས་རྒྱས་དང་བྱང་ཆུབ་སེམས་དཔའ་དང༌། ཁྲོ་བོ་དང༌། ལྷ་དང༌། ཀླུ་དང༌། ལྷ་མོའི་ཚོགས་ཀྱིས་ཡོངས་སུ་བསྐོར་བ། ཉན་པ་པོའི་འཁོར་ཤམ་བྷ་ལའི་ཡུལ་གྱི་རྒྱལ་པོ་ཆེན་པོ་ཟླ་བ་བཟང་པོ་དང་ཡུལ་དགུ་བཅུ་རྩ་དྲུག་གི་སྤྲུལ་པའི་རྒྱལ་པོ་དགུ་བཅུ་རྩ་དྲུག་ལ་སོགས་པ་སྐལ་བ་དང་ལྡན་པའི་གདུལ་བྱའི་ཚོགས་རྣམས་ནམ་མཁའི་ཁམས་མཐའ་ཡས་པའི་ཆོས་འབྱུང་གི་ནང་དུ་ཆུད་པའི་དཀྱིལ་འཁོར་དུ་བཅུག་སྟེ། ཞུ་བ་པོའི་འཁོར་ཆོས་རྒྱལ་ཟླ་བ་བཟང་པོས་གསོལ་བ་བཏབ་པ་ལས། འཇིག་རྟེན་དང་འཇིག་རྟེན་ལས་འདས་པའི་དབང་བསྐུར་བ་བྱིན་ནས། ལྷ་དང་ལྷ་མ་ཡིན་ལ་སོགས་པ་རྣམས་སངས་རྒྱས་ཉིད་དུ་ལུང་བསྟན་ཏེ་མཉམ་མེད་ཤཱཀྱའི་རྒྱལ་པོ་མངོན་པར་རྫོགས་པའི་སངས་རྒྱས་ནས་ལོ་ངོ་གཅིག་གི་རྗེས་ཀྱི་ནག་པ་ཟླ་བའི་ཚེས་བཅོ་ལྔ་ཉིན་དཔལ་དུས་ཀྱི་འཁོར་ལོའི་རྩ་བརྒྱུད་སྟོང་ཕྲག་བཅུ་གཉིས་པ་གསུངས། ཕྱི་ལོ་ ༡༠༢༧ ལོར་གྱི་ཇོ་ལོ་ཙཱ་བ་ཟླ་བའི་འོད་ཟེར་གྱིས་དུས་འཁོར་ཐོག་མར་བོད་ལ་བསྒྱུར་གནང་མཛད་པ་ནས་བོད་གངས་ཅན་གྱི་ལྗོངས་སུ་དར་འགོ་ཚུགས་ཤིང༌། དུས་འཁོར་བོད་དུ་བསྒྱུར་བ་ནས་རབ་བྱུང་དང་པོ་ཚུགས་ཤིང་ད་བར་དུས་འཁོར་བོད་ལ་བསྒྱུར་ནས་རབ་ལོ་ ༩༨༦ ཕྱིན་ཡོད།
ལྔ་པ། དུས་འཁོར་གྱི་རྒྱུད་ཇི་ལྟར་བསྡུས་པའི་ཚུལ་ནི། དེ་ཡང་པཎ་ཆེན་བློ་བཟང་ཆོས་རྒྱན་གྱིས་མཛད་པའི་དུས་འཁོར་ཤིས་བརྗོད་ལས།
རྒྱུད་རྒྱལ་སྡུད་མཛད་ཟླ་བཟང་གྲགས་པའི་ཞབས། །
རྒྱས་འགྲེལ་མཛད་པ་པདྨ་དཀར་པོ་སོགས། །
སྤྲུལ་པའི་ཆོས་རྒྱལ་བདུན་དང་རིགས་ལྡན་ཚོགས། །
ཞེས་གསུངས་པ་ལྟར། དུས་འཁོར་བའི་ལུགས་ཀྱིས་རྒྱུད་སྡུད་པ་པོ་དཔལ་ཕྱག་ན་རྡོ་རྗེའི་རྣམ་སྤྲུལ་ཆོས་རྒྱལ་ཟླ་བ་བཟང་པོས་དུས་འཁོར་རྩ་རྒྱུད་ལ་སོགས་པའི་རྒྱུད་སྡེ་རྣམས་ལེགས་པར་བསྡུས་ཤིང༌། རྩ་རྒྱུད་ལ་འགྲེལ་བཤད་སྟོང་ཕྲག་དྲུག་ཅུ་པ་མཛད་ནས། ཤམ་བྷ་ལར་དུས་ཀྱི་འཁོར་ལོའི་དཀྱིལ་འཁོར་བཞེངས་ཏེ། ལྷའི་དབང་ཕྱུག་སྟོན་པ་པོར་བསྐོས་ནས་མྱ་ངན་ལས་འདས་པར་གསུངས་སོ།།
དྲུག་པ། དུས་འཁོར་གྱི་ཆོས་འཁོར་འདི་བྱང་ཕྱོགས་ཤམ་བྷ་ལར་དར་ཚུལ་ནི།
རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ཐོག་མར་གསུང་ཡུལ་ཆེད་དུ་བྱ་བའི་གདུལ་བྱ་ནི། བྱང་ཤམ་བྷ་ལའི་རྒྱལ་པོ་ཉི་མའི་འོད་དང་བཙུན་མོ་ལྷ་མོ་རྣམ་པར་རྒྱལ་མའི་སྲས་ཆོས་རྒྱལ་ཟླ་བ་བཟང་པོས་སེམས་ཅན་ཐམས་ཅད་ཀྱིས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་འགྲུབ་པའི་དོན་དུ་སྟོན་པ་བཅོམ་ལྡན་འདས་ལ་གསོལ་བ་བཏབ་ཅིང༌། སྟོན་པ་བཅོམ་ལྡན་འདས་ཀྱིས་ཀྱང་ཆོས་རྒྱལ་ཟླ་བ་བཟང་པོས་གཙོ་བོར་བྱས་པའི་ཤམ་བྷ་ལ་བ་རྣམས་སྐལ་བ་དང་ལྡན་པ་ཉིད་དུ་གཟིགས་ནས་དཔལ་དུས་ཀྱི་འཁོར་ལོའི་རྩ་རྒྱུད་ཐོག་མར་གསུངས་པ་ཞིག་ཡིན།
ཆོས་རྒྱལ་ཟླ་བ་བཟང་པོས་སྟོན་པ་བཅོམ་ལྡན་འདས་ཀྱིས་ཇི་ལྟར་གསུངས་པ་རྣམས་ཐུགས་ལ་བཟུང་སྟེ་ཤམ་བྷ་ལར་བྱོན་པ་དང༌། སངས་རྒྱས་བཅོམ་ལྡན་འདས་སྐུ་མྱ་ངན་ལས་འདས་པའི་རྗེས་སུ་ཐུགས་ངོར་གསལ་བའི་རིམ་པ་རྣམས་ཤམ་བྷ་ལའི་སྐད་ཀྱིས་རྩ་རྒྱུད་དང༌། དེའི་འགྲེལ་བ་གླེགས་བམ་ལ་བྲིས་ཏེ་ལོ་གསུམ་གྱི་བར་དུ་རྒྱ་ཆེར་སྤེལ་བ་དང༌། དེ་ནས་སེམས་ཅན་ཐམས་ཅད་ཀྱིས་དངོས་གྲུབ་ཐོབ་པའི་སླད་དུ་ཤམ་བྷ་ལར་དུས་འཁོར་བློས་བསླངས་གསར་དུ་བཞེངས་པ་ནས་ཆོས་རྒྱལ་བདུན་དང༌། རིགས་ལྡན་ཉེར་ལྔ། དྲག་པོ་འཁོར་ལོ་ཅན་གྱི་རྒྱལ་རྒྱུད་བཅུ་གཉིས་ཏེ་དུས་འཁོར་རྩ་རྒྱུད་ནས་ཇི་ལྟར་སྟོན་པ་བཅོམ་ལྡན་འདས་ཀྱིས་ལུང་གིས་བསྔགས་པའི་རྒྱལ་པོ་བཞི་བཅུ་རྩ་གསུམ་གྱིས་ཤམ་བྷ་ལའི་ཡུལ་དུ་དུས་ཀྱི་འཁོར་ལོའི་བསྟན་པ་རྒྱ་ཆེར་སྤེལ་བ་ཡིན།
བདུན་པ། རིགས་ལྡན་རིམ་པར་བརྒྱུད་ཚུལ་ནི།
བཅོམ་ལྡན་འདས་ཀྱིས་རྩ་བའི་རྒྱུད་ཤམ་བྷ་ལའི་ཆོས་རྒྱལ་ཟླ་བ་བཟང་པོར་གསུངས་ནས་ཟླ་བ་བཟང་པོས་ཀྱང་རྩ་བའི་རྒྱུད་བསྡུས་པ་དང༌། འགྲེལ་བཤད་སྡེབ་སྦྱོར་རྗེས་སུ་བསྔགས་པའི་སྟོང་ཕྲག་དྲུག་ཅུ་པ་མཛད་ཅིང་གླེགས་བམ་ལ་བྲིས་ནས་ཤམ་བྷ་ལ་སོགས་པའི་ཡུལ་གྱི་མི་རྣམས་ལ་བསྟན། དུས་ཀྱི་འཁོར་ལོའི་དཀྱིལ་འཁོར་རིན་པོ་ཆེ་སྣ་ལྔ་ལས་བཞེངས་ཏེ་རྫུ་འཕྲུལ་བསྟན་ནས་མྱ་ངན་ལས་འདས་སོ། །དེ་ནས་ལྷ་དབང་གཟི་བརྗིད་ཅན་དང༌། ཟླ་བས་བྱིན་དང༌། ལྷའི་དབང་ཕྱུག་དང༌། སྣ་ཚོགས་གཟུགས་དང༌། ལྷའི་དབང་ལྡན་རྣམས་ཀྱིས་ལོ་བརྒྱ་བརྒྱར་ཆོས་བསྟན། དེ་ནས་འཇམ་དབྱངས་གྲགས་པས་ལོ་བརྒྱར་རྩ་བའི་རྒྱུད་བསྟན་ཏེ། དེ་ཡན་ཆད་རྩ་རྒྱུད་རྩ་འགྲེལ་ལ་འཆད་ཉན་བྱེད་པ་ཡིན། དེ་ནས་གྲགས་པས་ལོ་བརྒྱར་རྩ་རྒྱུད་བསྟན་པའི་རྗེས་སུ། ཉི་མའི་ཤིང་རྟ་ལ་སོགས་པ་རྣམས་སད་པར་མཛད་པས། དྲང་སྲོང་རྣམས་ཀྱིས་དབང་བསྐུར་ཞིང་བསྡུས་རྒྱུད་སྡུད་པར་གསོལ་བ་བཏབ་པས། ཟླ་བ་བཟང་པོས་བཞེངས་པའི་དཀྱིལ་འཁོར་དུ་ནག་པའི་ཉ་ལ་དྲང་སྲོང་རྣམས་ལ་དབང་བསྐུར་ཞིང༌། བསྡུས་པའི་རྒྱུད་མེ་ཏོག་ཕྲེང་འཛིན་གྱི་ཚིགས་བཅད་རྩ་བའི་རྒྱུད་ལས་བཏུས་པ་སྟོང་ཕྲག་སུམ་ཅུ་པ་མཛད་དོ། །དེ་ནས་དྲང་སྲོང་རྣམས་ཀྱིས་ས་གའི་ཉ་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ། གྲགས་པས་ཀྱང་པད་དཀར་ལ་རྒྱུད་སྟོན་ཅིང་འགྲེལ་བཤད་རྩོམ་པར་བསྐོས་ཤིང་མྱ་ངན་ལས་འདས། དེ་ནས་པད་དཀར་གྱིས་འགྲེལ་བཤད་སྟོང་ཕྲག་བཅུ་གཉིས་པ་མཛད་ཅིང་ཆོས་བསྟན། དེ་ནས་བཟང་པོ་དང༌། རྣམ་རྒྱལ་དང༌། བཤེས་གཉེན་བཟང་པོ་དང༌། ཕྱག་དམར་དང༌། ཁྱབ་འཇུག་སྦས་པ་དང༌། ཉི་མ་གྲགས་དང༌། ཤིན་ཏུ་བཟང་དང་བརྒྱད་ཀྱིས་ལོ་བརྒྱ་རེ་ཆོས་བསྟན་པར་གསལ་ལ། དེ་ནས་རྒྱ་མཚོ་རྣམ་རྒྱལ་དང༌། རྒྱལ་དཀའ་ཡིས་ཀྱང་ལོ་བརྒྱ་ཆོས་བསྟན་པར་གསལ། དེ་ནས་ཉི་མ་དང༌། སྣ་ཚོགས་གཟུགས་དང༌། ཟླ་བའི་འོད་དང༌། མཐའ་ཡས་དང༌། ས་སྐྱོང་དང༌། དཔལ་སྐྱོང་དང༌། སེངྒེ་དང༌། རྣམ་གནོན་དང༌། སྟོབས་པོ་ཆེ་དང༌། མ་འགག་པ་དང༌། མི་ཡི་སེངྒེ་དང༌། དབང་ཕྱུག་ཆེན་པོ་དང༌། མཐའ་ཡས་དང༌། རྣམ་རྒྱལ་རྣམས་དང༌། དྲག་པོ་འཁོར་ལོ་ཅན་ནི་རིགས་ལྡན་ཉེར་ལྔའི་རྗེས་ཐོགས་སུ་འབྱུང་བར་གསུངས།
བརྒྱད་པ། དུས་ཀྱི་འཁོར་ལོའི་རྒྱས་འགྲེལ་མཛད་པ་པོ་ནི།
དབང་མདོར་བསྟན་ལྟར་ན
རྒྱུད་ལ་མདོར་བསྟན་རྣམ་གསུམ་དང༌། །
རྒྱས་པར་བཤད་པ་གསུམ་དུ་འགྱུར། །
ཞེས་གསུངས་པ་ལྟར་བསྡུས་རྒྱུད་ནི་མདོར་བསྟན་ཡིན་ལ། དེའི་དཀའ་འགྲེལ་ནི་རབ་ཏུ་མདོར་བསྟན་དང༌། རྒྱ་ཆེར་འགྲེལ་ནི་མདོར་བསྟན་ཆེན་པ་ཡིན། རྩ་བའི་རྒྱུད་ནི་རྒྱས་བཤད་ཡིན་ལ། དེའི་དཀའ་འགྲེལ་ནི་རབ་ཏུ་རྒྱས་བཤད། རྒྱ་ཆེར་འགྲེལ་ནི་རྒྱས་བཤད་ཆེན་པོ་སྟེ། འགྲེལ་པ་དེ་དག་ཀྱང་ས་བཅུའི་དབང་ཕྱུག་གིས་མཛད་པ་ཡིན། དེ་ལྟར་རྒྱུད་ཐམས་ཅད་རྩ་བའི་རྒྱུད་དང༌། བསྡུས་པའི་རྒྱུད་གཉིས་སུ་འདུས་ཏེ། དང་པོ་ཉིད་དུ་གསལ་བར་གསུངས་པ་ནི་རྩ་བའི་རྒྱུད་ཡིན་ལ། ཕྱིས་དེ་ཉིད་གདུལ་བྱའི་དབང་གིས་བསྡུས་ཏེ་གསུངས་པ་ནི་བསྡུས་རྒྱུད་དང་ཉུང་ངུའི་རྒྱུད་ཡིན་པར་གསུངས་སོ།།
དགུ་པ། དུས་འཁོར་གྱི་རྒྱུད་རྒྱ་གར་འཕགས་ཡུལ་དུ་དར་ཚུལ་ནི།
ཤམ་བྷ་ལའི་རྒྱལ་པོ་རིགས་ལྡན་རྒྱལ་དཀས་རྒྱལ་སྲིད་སྐྱོང་སྐབས། རྒྱ་གར་གྱི་མཁས་པ་དུས་ཞབས་ཆེན་པོ་འཇམ་པའི་རྡོ་རྗེ་ཞེས་མདོ་སྔགས་ཀུན་ལ་མཁས་པ་ཞིག་བྱོན་པ་དེ་རྒྱ་གར་ནས་བྱང་ཕྱོགས་སུ་ཕེབས་ཏེ། མཐར་ཤམ་བྷ་ལར་བྱོན་ནས་རིགས་ལྡན་དངོས་དང་མཇལ་བ་དེ་བླ་མར་བསྟེན་ནས། དུས་ཀྱི་འཁོར་ལོས་གཙོས་པའི་རྒྱུད་སྡེ་མང་པོ་གསན་པ་དང༌། དེ་ཡང་འགའ་ཞིག་ཐུགས་ངོར་བཞེས། ལ་ལ་གླེགས་བམ་དུ་བྲིས་ཏེ་རྒྱ་གར་འཕགས་ཡུལ་དུ་གདན་དྲངས་པ་ནི་རྒྱ་གར་དུ་དུས་འཁོར་གྱིས་གཙོས་པའི་རྒྱུད་སྡེའི་བསྟན་པ་རྒྱ་ཆེར་དར་བའི་འགོ་ཚུགས་པ་ཞིག་ཡིན། དེ་ནས་དུས་ཞབས་པ་རང་གི་སློབ་མ་དུས་ཞབས་པ་ཆུང་བ་ཤྲི་བྷ་དྲས་དུས་ཀྱི་འཁོར་ལོའི་བསྟན་པ་ས་དར་རྡོ་དར་དུ་ཁྱབ་བརྡལ་བཏང༌། དེའི་སྲས་བྱང་ཆུབ་བཟང་པོ་དང་དེའི་སློབ་མ་ཁ་ཆེ་ཟླ་བ་མགོན་པོ་སོགས་ཀྱིས་དུས་ཀྱི་འཁོར་ལོའི་བསྟན་པ་ཕྱོགས་མཚམས་མུ་མེད་པར་སྤེལ། དེ་ལྟར་རྒྱ་གར་དུ་ཐོག་མར་དུས་ཞབས་པ་ཆེན་པོ་འཇམ་པའི་རྡོ་རྗེས་དར་བར་བྱས་ཤིང༌། དེས་དུས་ཞབས་པ་ཆུང་བ་ཤྲི་བྷ་དྲ་དང༌། དེས་སྲས་བྱང་ཆུབ་བཟང་པོ། དེས་ཁ་ཆེའི་པཎ་ཆེན་ཟླ་བ་མགོན་པོ་ལ་བསྩལ་བས་མཚོན་རྒྱ་གར་འཕགས་ཡུལ་དུ་དུས་ཀྱི་འཁོར་ལོའི་བསྟན་པ་རྒྱ་ཆེར་དར་རོ།།
བཅུ་པ། དུས་འཁོར་རྩ་རྒྱུད་བོད་དུ་དར་ཚུལ་ནི།
དེ་ཡང་ཁ་ཆེའི་པཎ་ཆེན་ཟླ་བ་མགོན་པོས་དུས་འཁོར་བསྡུས་རྒྱུད་དང༌། འགྲེལ་ཆེན་གཉིས་བསྣམས་ནས་ཐོག་མར་གཙང་ཁ་རག་དང༌། དེ་ནས་འཕན་ཡུལ་དུ་བྱོན་པ་ན། འབྲོ་ལོ་ཙཱ་བ་ཤེས་རབ་གྲགས་ཀྱིས་ཞུས་ཤིང༌། བསྡུས་རྒྱུད་དང་འགྲེལ་པ་བསྒྱུར་བ་ནི་བོད་ཀྱི་མཁས་པས་དུས་འཁོར་གྱི་དབང་རྒྱུད་གདམས་ངག་ཞུས་པ་ཐོག་མ་དང༌། རྒྱུད་དང་འགྲེལ་པ་བོད་སྐད་དུ་བསྒྱུར་བའང་ཐོག་མ་ཡིན། ཁོང་གིས་ལྷ་རྗེ་སྒོམ་པ་དཀོན་མཆོག་སྲུང་ལ་དབང་གི་བཀའ་དང་བཤད་པའི་ལུང༌། མན་ངག་གི་བཀའ་བཅས་གནང་བ་རིམ་པར་བརྒྱུད་དེ་ཀུན་མཁྱེན་ཆོས་སྐུ་འོད་ཟེར་ཞབས་ལས་བླ་མ་རྒྭ་ལོས་གསན་པ་དང༌། ཡང་དེ་དང་ཕྱོགས་མཚུངས་པར་རྭ་ལོ་ཙཱ་བ་ཆོས་རབ་ཀྱིས་དུས་ཞབས་པའི་སློབ་མ་མཛཉུ་ཀིརྟི་དང༌། དེའི་སློབ་མ་བལ་པོ་ཡེ་རང་པ་ས་མན་ཊ་ཤྲིའ་བྷ་དྲ་ཞུ་བ་བོད་དུ་གདན་དྲངས་ནས་དུས་འཁོར་རྒྱུད་འགྲེལ་བསྒྱུར་བ་དང་འབྲེལ། དབང་རྒྱུད་མན་ངག་དང་བཅས་པ་ཞུས་ཤིང༌། དེས་ཡེ་ཤེས་སེངྒེ་ལ་གནང༌། དེས་བླ་མ་རྒྭ་ལོ་ལ་གནང་བ་ནས་བཟུང་སྟེ། རྭ་འབྲོ་ལུགས་གཉིས་ཆུ་བོ་གཅིག་འདྲེས་སུ་གྱུར། བོད་གངས་ཅན་གྱི་ལྗོངས་སུ་དུས་འཁོར་གྱི་རྒྱུད་འགྲེལ་བཅུ་དྲུག་ཙམ་ཡོད་པ་ལས། རྭ་འབྲོའི་འགྱུར་གཉིས་ལ་དབང་གི་བཀའ་དང༌། བཤད་པའི་བཀའ། མན་ངག་གི་བཀའ་གསུམ་ཚང་བས་གཙོ་བོར་བྱེད་པ་ཡིན
བཅུ་གཅིག རི་བོ་དགེ་ལྡན་པའི་ཕྱོགས་སུ་དར་ཁྱབ་བྱུང་ཚུལ་ནི།
དུས་རབས་བརྒྱ་ཕྲག་བཅུ་གསུམ་པའི་ནང་བྱོན་པའི་བུ་སྟོན་ཐམས་ཅད་མཁྱེན་པ་ཡབ་སྲས་ཀྱི་རིང་ལའང་རྭ་འབྲོའི་ལུགས་དར་ཁྱབ་ཆེ་བ་སྟེ། དེ་ཡང་བུ་སྟོན་རིན་ཆེན་གྲུབ་ཀྱིས་འཆད་ཉན་ཕྱག་ལེན་དང་བཅས་པའི་རིམ་པས་གཙང་ཞ་ལུའི་ཕྱོགས་སུ་ཆེས་ཆེར་དར་བར་མཛད་པ་དང༌། ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་བུ་སྟོན་གྱི་དངོས་སློབ་མཁས་གྲུབ་ཁྱུང་པོ་ལྷས་པ་ནས་དབང་རྒྱུན་དང༌། བདེ་ཆེན་དཔལ་བ་ནས་རྒྱུད་འགྲེལ་གྱི་བཤད་པ་དང་ཕྱག་ལེན་གྱི་མཛུབ་ཁྲིད། སྦྱོར་དྲུག་གི་ཉམས་ཁྲིད་སོགས་ཡོངས་སུ་རྫོགས་པར་ཞུས་པ་དང་འབྲེལ་སྲས་ཀྱི་ཐུ་བོ་མཁས་གྲུབ་ཐམས་ཅད་མཁྱེན་པ་སོགས་ལ་སྨིན་བྱེད་ཀྱི་དབང་དང༌། གྲོལ་བྱེད་ཁྲིད་ཀྱི་རིམ་པ་ལྷག་མེད་དུ་གནང་སྟེ། རྩ་རྒྱུད་འགྲེལ་བཤད་དང་བཅས་པའི་ལྗགས་བཤད་ཁྱབ་བརྡལ་དུ་བཏང་གནང་བ་དེ་འདྲ་ནི་སྔར་གྱི་བསྟན་འབྱུང་ལོ་རྒྱུས་ནང་བྱུང་མྱོང་མེད་པ་ལྟ་བུ་ཡིན་སྟབས། འགོས་ལོ་ཙཱ་བ་གཞོན་ནུ་དཔལ་སོགས་ཀྱིས་རྗེ་བཙུན་ཙོང་ཁ་པ་ཆེན་པོ་ནི་སྨོན་ལམ་གྱི་མཐུ་གྲུབ་པའི་སྐྱེས་བུ་ལགས་པས་གཞན་གྱིས་བརྒྱ་ཚར་བཤད་པ་ལས་རྗེ་འདིས་དུས་འཁོར་ལན་གཅིག་གསུངས་པ་དེས་ས་སྟེང་དུ་ཁྱབ་པ་བྱུང་ཞེས་བསྔགས་བརྗོད་གནང་ཡོད།
བཅུ་གཉིས། སྐུ་བཅར་རྣམ་རྒྱལ་གྲྭ་ཚང་དུ་གསར་འཛུགས་ཇི་ལྟར་མཛད་ཚུལ་ནི།
རྗེ་བདག་ཉིད་ཆེན་པོ་ནས་མཁས་གྲུབ་རྗེ་དང༌། ྋརྒྱལ་དབང་ལྔ་པ་ཆེན་པོ་ངག་དབང་བློ་བཟང་རྒྱ་མཚོ། ྋརྒྱལ་མཆོག་བདུན་པ་བསྐལ་བཟང་རྒྱ་མཚོ་སོགས་རིམ་པར་དར་འཕེལ་ཉམས་བཞེས་མཛད་པ་མ་ཟད། ྋརྒྱལ་མཆོག་བསྐལ་བཟང་རྒྱ་མཚོས་ཕྱི་ལོ་ ༡༧༥༢ ལོའི་བོད་ཟླ་གསུམ་པའི་ཚེས་བཅོ་ལྔ་སྟེ་དུས་འཁོར་རྩ་རྒྱུད་གསུངས་པའི་དུས་ཆེན་དང་སྟབས་བསྟུན་གྱིས་ཐུན་མོང་མ་ཡིན་པའི་དཔལ་དུས་ཀྱི་འཁོར་ལོའི་གར་ཐིག་དབྱངས་གསུམ་སོགས་ཆ་ལག་ཡོངས་སུ་ཚང་བའི་ཆོག་གཞུང་འདི་ཉིད་ྋརྒྱལ་མཆོག་སྐུ་ཕྲེང་བདུན་པ་བསྐལ་བཟང་རྒྱ་མཚོ་མཆོག་གིས་དགོངས་རྒྱ་ཆེ་བཞེས་ཀྱིས་གྲྭ་ཚང་རིན་པོ་ཆེ་འདི་ཉིད་དུ་ཆུ་ཕོ་སྤྲེལ་ལོ་སྟེ་ཕྱི་ལོ་ ༡༧༥༢ ལོར་འཕྱོངས་རྒྱས་རི་བོ་བདེ་ཆེན་ནས་དུས་འཁོར་ཆོག་གྲྭ་དང༌། གྲྭ་ཚང་ལ་སློབ་ཁྲིད་ཀྱིས་དུས་འཁོར་སྒྲུབ་མཆོད་གསར་འཛུགས་བཀའ་དྲིན་ཆེ་ཞིང༌། སྐབས་དེར་ཆེད་དུ་བྱ་བའི་གདུལ་བྱ་སེར་སྐྱ་ ༡༣༠༠ ཙམ་ལ་དཔལ་དུས་ཀྱི་འཁོར་ལོའི་དབང་ཆེན་ཡང་བཀའ་དྲིན་སྩལ།
བཅུ་གསུམ། སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་ནས་ད་བར་ཉམས་བཞེས་རྒྱུན་འཛིན་ཇི་ལྟར་གནང་ལུགས་ནི།
དེ་ཡང་ྋརྒྱལ་མཆོག་བསྐལ་བཟང་རྒྱ་མཚོའི་རྣམ་ཐར་དཔག་བསམ་རིན་པོ་ཆེའི་སྙེ་མ་ལྟར་ན། རི་བོ་བདེ་ཆེན་གྱི་ཆོག་གྲྭ་དང༌། རྣམ་རྒྱལ་གྲྭ་ཚང་གི་དུས་འཁོར་ཆོག་གྲྭ་བ་སོགས་ཁྱོན་འདུས་པ་ཆིག་སྟོང་སུམ་བརྒྱ་སྐོར་ལ་རྒྱུད་ནས་གསུངས་པ་བཞིན་དཔལ་དུས་ཀྱི་འཁོར་ལོའི་དབང་ཆེན་སྩལ་ནོད་བཀའ་དྲིན་ཆེ་ཞིང༌། དབང་ཆེན་གྱི་མཇུག་ཏུ་དུས་ཀྱི་འཁོར་ལོའི་བརྒྱུད་འདེབས་དང༌། སྒྲུབ་ཐབས་ཆོག་བསྒྲིགས་མ་གསར་རྩོམ་བཅས་ཀྱི་ལྗགས་ལུང་ཡང་གནང༌། དེ་ནས་བཟུང་ཆོས་འདིའི་རྒྱུན་མི་ཉམས་པར་བྱ་བའི་སླད་དུ་དགོངས། རྣམ་རྒྱལ་གྲྭ་ཚང་གི་གྲྭ་པ་སུམ་ཅུ་སོ་ལྔ་སྐོར་ཆོ་ག་ལེགས་པར་འཛིན་འཇུག་པ་གནང་སྟེ་ཟླ་བ་བྱུང་ངོ་ཅོག་གི་ཚེས་བརྒྱད་ལ་དཔལ་དུས་ཀྱི་འཁོར་ལོའི་བདག་མདུན་བུམ་སྒྲུབ་སོགས་སྔོན་དུ་འགྲོ་བའི་བདག་འཇུག་གི་ཆོ་ག་ཡོངས་རྫོགས་དང༌། ལོ་ལྟར་ནག་པ་ཟླ་བའི་ཚེས་བདུན་ནས་བཟུང་རྡུལ་ཚོན་གྱི་དཀྱིལ་འཁོར་ལེགས་པར་བཞེངས་ཏེ་དུས་ཆེན་ནས་བརྩམས་ཏེ་ཉིན་བདུན་གྱི་རིང་སྒྲུབ་མཆོད་རྒྱས་པར་བྱེད་པའི་སྲོལ་བཟང་གསར་འཛུགས་གནང་སྐོར་རྣམ་ཐར་དུ་གསལ་བ་ལྟར། དེ་ནས་བཟུང་སྟེ་སྐུ་བཅར་རྣམ་རྒྱལ་གྲྭ་ཚང་ལ་བཅོམ་ལྡན་འདས་དཔལ་དུས་ཀྱི་འཁོར་ལོའི་ཆོག་གཞུང་ཉམས་བཞེས་ཀྱི་རྒྱུན་གསར་འཛུགས་མཛད་པས་དུས་འཁོར་འདི་ཉིད་གྲྭ་ཚང་འདིའི་ཐུན་མོང་མ་ཡིན་པའི་རྒྱུན་གྱི་ཕྱག་ལེན་ཞིག་ཏུ་གྱུར་པས་ན་གྲྭ་ཚང་འདི་ཉིད་ལ་དུས་འཁོར་གྲྭ་ཚང་ཞེས་ཀྱང་བརྗོད་སྲོལ་བྱུང༌། དུས་འཁོར་སྒྲུབ་མཆོད་ཚུགས་རྒྱུའི་དཀྱིལ་འཁོར་བྲི་སྒྲུབ་ཀྱི་ས་ཆོག་དང་ཉེ་བར་སྔོན་ནས་རྒྱལ་སྲས་རིན་པོ་ཆེ་གོང་མའི་ཕྱག་སྲོལ་དང༌། ལོ་སྔོན་མ་ཞྭ་ལུ་ནས་བུ་སྟོན་ཐམས་ཅད་མཁྱེན་པའི་ཕྱག་བཞེས་ཀྱི་རྒྱུན་ནས་ལེགས་ཆ་བླངས་པ་དང་གུང་བསྒྲིགས་ཏེ་གཞུང་ཆེན་མོ་དང་བསྟུན་པའི་བཟོ་བཅོས་ལེགས་པར་མཛད་པའི་གར་ལའང་གཟིགས་རྟོག་གནང་ཞེས་མཛད་རྣམ་དཔག་བསམ་སྙེ་མར་གསལ་བ་ལྟར་ད་ལྟའི་སྐུ་བཅར་རྣམ་རྒྱལ་གྲྭ་ཚང་གི་ཕྱག་རྒྱུན་འདི་ྋརྒྱལ་མཆོག་བསྐལ་བཟང་རྒྱ་མཚོ་མཆོག་གིས་གར་ཐིག་དབྱངས་གསུམ་དང་པ་ཆ་ལག་ཡོངས་སུ་ཚང་མའི་ཆོག་གཞུང་གྲྭ་ཚང་དུ་གསར་འཛུགས་བསྐྱངས་པའི་བསྟན་རྒྱུན་གྱི་ཕྱག་ལེན་ཉམས་མེད་རྒྱུན་འཛིན་གནང་བ་དེ་ཉིད་ཡིན།
བཅུ་བཞི། དུས་འཁོར་གྱི་གསན་རྒྱུན་ལ་མཚོན་ན།
དེ་ལྟར་རྗེ་བདག་ཉིད་ཆེན་པོ་ལས་མཁས་གྲུབ་ཐམས་ཅད་མཁྱེན་པས་གསན་ཏེ། མཁས་གྲུབ་རྗེས་དུས་འཁོར་ཊིའཀ་ཆེན་དེ་ཉིད་སྣང་བ་མཛད་པས་ཐོག་དྲངས་དུས་འཁོར་དང་འབྲེལ་བའི་བསྟན་བཅོས་མང་དུ་མཛད་པ་ལ་བརྟེན་ནས་དགེ་ལུགས་པའི་གྲུབ་མཐའི་ནང་དར་ཁྱབ་ཆེན་པོ་བྱུང་སྟེ། པཎ་ཆེན་བློ་བཟང་ཆོས་རྒྱན། ྋརྒྱལ་མཆོག་ལྔ་པ་ཆེན་པོ་ངག་དབང་བློ་བཟང་རྒྱ་མཚོ། ྋརྒྱལ་མཆོག་བདུན་པ་བསྐལ་བཟང་རྒྱ་མཚོ། པཎ་ཆེན་དཔལ་ལྡན་ཡེ་ཤེས་སོགས་དགེ་ལུགས་པའི་སྐྱེས་ཆེན་དམ་པ་དུ་མ་རིམ་བརྒྱུད་ཀྱིས་དགའ་ལྡན་ཁྲི་ཐོག་གོ་བརྒྱད་པ་ྋསྐྱབས་རྗེ་ཡོངས་འཛིན་གླིང་སྤྲུལ་རྡོ་རྗེ་འཆང་ཐུབ་བསྟན་ལུང་རྟོགས་རྣམ་རྒྱལ་འཕྲིན་ལས་དཔལ་བཟང་པོ་མཆོག་གི་ཞལ་སྔ་ནས་བོད་ཆུ་འབྲུག་ཕྱི་ལོ་ ༡༩༥༢ ལོར་ཕོ་བྲང་པོ་ཏ་ལའི་ཚོམས་ཆེན་དུ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག རང་ཅག་གངས་ཅན་པ་རྣམས་ཀྱི་ཚེ་རབས་གཏན་གྱི་སྐྱབས་མགོན་གཅིག་པུ། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་གསན་ཅིང༌། འཁྲུངས་རབས་གསོལ་འདེབས་ལས།
སྙིང་རྗེ་ཆེན་པོའི་སྟོབས་ཀྱིས་འཚེ་མེད་ལམ། །
རྒྱ་ཆེར་སྤེལ་ལས་ཞི་བདེའི་གཟེངས་རྟགས་ཕུལ། །
འཛམ་གླིང་ཀུན་གྱིས་བཀུར་ཞིང་དུས་འཁོར་དངོས། །
བསྟན་འཛིན་རྒྱ་མཚོའི་ནོར་བུར་གསོལ་བ་འདེབས། །
ཞེས་གསུངས་པ་ལྟར་བཅོམ་ལྡན་འདས་དཔལ་དུས་ཀྱི་འཁོར་ལོ་དངོས་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་ཕྱི་ལོ་ ༡༩༥༢ ལོར་ནོར་གླིང་དུ་བཅོམ་ལྡན་འདས་དཔལ་དུས་ཀྱི་འཁོར་ལོའི་དབང་ཆེན་ཐེངས་དང་པོ་སྩལ་བ་ནས་བཟུང་ཕྱི་ལོ་ ༢༠༡༢ ལོར་འཕགས་ཡུལ་དབུས་འགྱུར་འཆང་གི་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ཐེངས་སོ་གཉིས་སྩལ་ནོད་བཀའ་དྲིན་བཀའ་དྲིན་གྱིས་བསྐྱངས་པ་ལྟར་འདི་ག་སྐུ་བཅར་རྣམ་རྒྱལ་གྲྭ་ཚང་ཕན་བདེ་ལེགས་བཤད་གླིང་ནས་༸གོང་ས་༸སྐྱབས་མགོན་ཆེན་པོ་མཆོག་གི་དུས་འཁོར་དབང་ཆེན་སོགས་ཀྱིས་མཚོན་གསུང་ཞབས་ཀྱི་ཞུ་སྒོ་ཁག་ལྷག་བློ་ཆེར་བསྐྱེད་ཀྱིས་ཞུ་རྒྱུའི་སྐལ་བཟང་གོ་སྐབས་གཅིག་མིན་དུ་མར་སྨིན་པདང་། དཔལ་དུས་ཀྱི་འཁོར་ལོའི་ཐུན་མོང་མ་ཡིན་པའི་ཕྱག་ལེན་ཁག་མི་ཉམས་རྒྱུན་འཛིན་དང་། ཉམས་པ་གསར་གསོ་སོགས་བསྟན་འགྲོར་ཕན་བདེ་སྤེལ་བའི་རླབས་ཆེན་གྱི་གྲུབ་འབྲས་སྨིན་ཡོད་ལ།
ཕྱི་ལོར་ ༢༠༡༤ ལོར་ལ་དྭགས་དང་སོག་ཡུལ་གཉིས་སུ་ཡང་དཔལ་དུས་ཀྱི་འཁོར་འཁོར་ལོའི་ཐེངས་ ༣༣ དང༌། ༣༤ གཉིས་གནང་གཏན་འཁེལ་ཡོད། དེ་ལྟར་བཅོམ་ལྡན་འདས་དཔལ་དུས་ཀྱི་འཁོར་ལོའི་དབང་ཆེན་ཐེངས་སོ་གཉིས་སྨིན་སྩལ་བཀའ་དྲིན་བསྐྱངས་པས་མཚོན། འཛམ་གླིང་སྐྱེ་འགྲོ་ཡོངས་ཞི་བདེའི་ངང་འཚོ་སྡོད་ཀྱི་གཞི་རྩ་སོགས་ལ་ཆེད་དམིགས་ཀྱིས་ཕྱོགས་དང་མུ་མེད་པར་དར་སྤེལ་གནང་མུས་ཀྱིས་སྐབས་འདི་ལགས་སོ།།
བཅོ་ལྔ་པ། དཔལ་དུས་ཀྱི་འཁོར་ལོ་ནི་བླ་མེད་ཀྱི་རྒྱུད་སྡེ་ཞིག་སྟེ།
དུས་ཞེས་པ་དུས་གསུམ་གང་དུ་ཡང་འགྱུར་བ་མེད་པ་ཡུལ་སྟོང་ཉིད་ལ་གཉིས་སྣང་ནུབ་པའི་མཆོག་ཏུ་མི་འགྱུར་བའི་བདེ་ཆེན་གྱི་ཐུགས་དང༌། འཁོར་ཞེས་པ་དེ་ཉིད་ལྷ་སྐུ་བཞིན་ལག་གི་རྣམ་པར་ཤར་བའི་རྟེན་བརྟེན་པའི་དཀྱིལ་འཁོར་ཏེ་སྐུ་ཐུགས་ཟུང་དུ་འཇུག་པའི་རྣམ་ཀུན་མཆོག་ལྡན་གྱི་སྟོང་ཉིད་ཡིན་ལ། བདེ་སྟོང་གཉིས་སུ་མེད་པའི་དོན་གྱིས་དཔལ་ཞེས་དང༌། གཞི་ལམ་འབྲས་གསུམ་གྱི་རྣམ་གཞག་ཐམས་ཅད་ཕྱི་ནང་གཞན་གསུམ་གྱི་སྦྱོར་བས་དུས་ཀྱི་འཁོར་ལོ་ཞེས་བྱའོ། །
བཅུ་དྲུག་པ། བཅོམ་ལྡན་འདས་དཔལ་དུས་ཀྱི་འཁོར་ལོའི་ནང་དོན་ནི། ཕྱི་ནང་གཞན་གསུམ་དུས་ཀྱི་འཁོར་ལོ་ཡི། །
ཞེས་གསུངས་པ་ལྟར་དུས་འཁོར་ལ་ཕྱི་དུས་ཀྱི་འཁོར་ལོ་དང༌། ནང་དུས་ཀྱི་འཁོར་ལོ། གཞན་དུས་ཀྱི་འཁོར་ལོ་བཅས་གསུམ་ཡོད་པ་ལ། དེ་ཡང་ཕྱི་དུས་ཀྱི་འཁོར་ལོ་ནི། ཟླ་བ་བཅུ་གཉིས་དང་ཞག་མ་སུམ་བརྒྱ་དྲུག་ཅུ་སོགས་ནི་དུས་དང༌། ལོ་འཁོར་གཅིག་ལ་དེ་དག་འཁོར་བས་དུས་འཁོར་ཞེས་བརྗོད་པ་དང༌། དེས་མཚོན་ནས་ཉི་ཟླ་རྒྱུ་སྐར་གྱི་འཁོར་ཚུལ་ཡང་དེའི་ནང་དུ་འདུས་ཡོད། ནང་དུས་ཀྱི་འཁོར་ལོ་ནི། ལྟེ་བའི་རྩ་ཆེན་བཅུ་གཉིས་ལས་རླུང་གི་འཕོ་བ་བཅུ་གཉིས་དང༌། དེ་དང་ཆབས་ཅིག་སྣ་བུག་རླུང་གི་རྒྱུ་བ་འཕོ་ཆེན་བཅུ་གཉིས་འབྱུང་ལ། འཕོ་ཆེན་རེ་རེ་ལའང་འཕོ་ཆུང་ལྔ་ལྔ་ཡོད་ཅིང༌། འཕོ་ཆེན་བཅུ་གཉིས་ཀྱི་ཚུལ་ནི། ལྟེ་བའི་ཁྱིམ་གྱི་རྩ་གཅིག་གི་ནང་རླུང་སྟོང་དང་བདུན་བརྒྱ་ཞེ་གསུམ་དང་བཞི་ཆ་གསུམ་བཅས་རྒྱུ་བའི་མཇུག་ཏུ། དབུ་མའི་ནང་ང་དྲུག་དང་བཞི་ཆ་གཅིག་བཅས་རྒྱུ་བ་ལ་འཕོ་བ་གཅིག་དང༌། དེ་རྗེས་རྩ་གཞན་ནང་ལ་འཕོས་ནས་སྔར་ལྟར་རྒྱུ་བའི་ཞག་གཅིག་ལ་ཁྱིམ་གྱི་རྩ་བཅུ་གཉིས་ཀྱི་འཕོ་བ་རྫོགས་ཚེ་རླུང་ཉིས་ཁྲི་ཆིག་སྟོང་དྲུག་བརྒྱ་འགྱུར་ཞིང༌། དེ་བཞིན་སྣ་བུག་གི་འཕོ་བ་རེ་རེར་རླུང་གི་རྒྱུ་བ་སྟོང་དང་བརྒྱད་བརྒྱ་ཡོད། ཞག་གཅིག་གི་འཕོ་བ་བཅུ་གཉིས་ལ་རླུང་གི་རྒྱུ་བ་ཉིས་ཁྲི་ཆིག་སྟོང་དྲུག་བརྒྱ་ཡོད། མདོར་ན། དེ་ལྟར་རླུང་གི་འཕོ་ཆེན་བཅུ་གཉིས་དང༌། རླུང་གི་རྒྱུ་བ་ཉིས་ཁྲི་ཆིག་སྟོང་དྲུག་བརྒྱ་རྣམས་ནི་དུས་དང༌། ཉིན་ཞག་གཅིག་ལ་དེ་དག་འཁོར་བས་ནང་དུས་ཀྱི་འཁོར་ལོ་ཞེས་བརྗོད་པ་ཡིན།
གཞན་དུས་ཀྱི་འཁོར་ལོ་ནི། དུས་འཁོར་གྱི་དབང་དང༌། བསྐྱེད་རིམ། རྫོགས་རིམ་སོགས་ཡིན་ཞིང༌། དེ་ཡང་སྨིན་བྱེད་རྒྱུ་ཡི་དབང་གིས་ལམ་བསྐྱེད་རྫོགས་སྒོམ་པས་རྒྱུད་སྨིན་པར་བྱེད་ཅིང༌། སྦྱང་གཞི་མ་དག་པའི་ཕྱི་ནང་གི་དུས་འཁོར་རྣམས་སྦྱོང་བྱེད་དཔལ་དང་པོའི་སངས་རྒྱས་དཀྱིལ་འཁོར་གྱི་འཁོར་ལོ་སྦྱང་གཞི་དང་རྣམ་པ་མཐུན་པའི་ལམ་སྒོམ་པའི་བསྐྱེད་རིམ་དང༌། རྫོགས་རིམ་གྱིས་མ་དག་པའི་སྦྱང་གཞི་རྣམས་རིམ་གྱིས་སྦྱངས་ནས་ལམ་བགྲོད་དགོས་པས། སྦྱང་གཞི་དང་རྣམ་པ་མཐུན་པའི་དཔལ་དུས་ཀྱི་འཁོར་ལོའི་སྐུ་ཡིས་མཚོན་དོན་ནི། སྦྱང་གཞི་ཕྱི་ཡི་ཟླ་བ་བཅུ་གཉིས་ཉི་ཟླ་གཟའ་སྐར་རྣམས་ལྷོ་བགྲོད་དང་བྱང་བགྲོད་གཉིས་སུ་ངེས་པ་ལྟར་ཞག་གཅིག་གི་རླུང་གི་འཕོ་བ་བཅུ་གཉིས་པོ་ཐམས་ཅད་ཀྱང་རོ་རྐྱང་གི་རྩ་གཡས་འཕོ་དང་གཡོན་འཕོ་གཉིས་སུ་ངེས་པས་དེ་དང་རྣམ་པ་མཐུན་པའི་ཞབས་གཉིས་པ། ཕྱི་ཡི་ཟླ་བ་བཅུ་གཉིས་བཞི་ཚན་གསུམ་དུ་ངེས་པ་ལྟར་རླུང་གི་འཕོ་བ་ཡང་དེ་ལྟར་དུ་ངེས་པས་དེ་དང་རྣམ་པ་མཐུན་པའི་མགྲིན་པ་གསུམ་པ། ཕྱི་ནང་གི་དུས་སྦྱོར་ཐམས་ཅད་གསུམ་ཚན་བཞིར་ངེས་པ་ལྟར་དེ་དང་རྣམ་པ་མཐུན་པའི་ཞལ་བཞི་པ། ཕྱི་ཡི་ཉི་ཟླ་ལྷོ་བགྲོད་དང་བྱང་བགྲོད་ཀྱི་ཟླ་བ་བཅུ་གཉིས་དེ་ཟུང་དྲུག་ཏུ་འདུས་པ་ལྟར། གཡས་གཡོན་གྱི་འཕོ་ཆེན་བཅུ་གཉིས་དེ་ཟུང་དྲུག་ཏུ་ངེས་པ་དང་མཐུན་པའི་ཕྲག་པ་དྲུག་པ། ལྷོ་བགྲོད་དང་བྱང་བགྲོད་ཀྱིས་འཁོར་སྐྱོད་བྱེད་པའི་ཟླ་བ་བཅུ་གཉིས་དང༌། ནང་གི་ལྟེ་བའི་རྩ་འཁོར་གྱི་འཕོ་ཆེན་བཅུ་གཉིས། སྣ་བུག་གི་འཕོ་ཆེན་བཅུ་གཉིས་སོགས་དང་རྣམ་པ་མཐུན་པའི་དཔུང་པ་བཅུ་གཉིས། ཕྱི་ཡི་ཟླ་བ་བཅུ་གཉིས་ལ་ཉིན་མཚན་གཉིས་སུ་ཕྱེ་བས་ཉེར་བཞི་དང༌། ནང་རླུང་གི་འཕོ་བའི་ཁུག་པ་གཅིག་ལ་ལྡང་འཇུག་གཉིས་སུ་ཕྱེ་བས་ཉེར་བཞི་དང་རྣམ་པ་མཐུན་པའི་ཕྱག་ཉེར་བཞི། ཕྱི་ན་ལོ་གཅིག་ལ་དུས་སྦྱོར་ཁྱིམ་ཞག་སུམ་བརྒྱ་དྲུག་ཅུ་ཡོད་པ་ལྟར་ཞག་གཅིག་གི་རླུང་གི་འཕོ་བ་ལ་ཡང་དབུགས་དྲུག་ཅུ་པ་སུམ་བརྒྱ་དྲུག་ཅུ་ཡོད་པས་དེ་དང་རྣམ་པ་མཐུན་པའི་ཕྱག་གི་སོར་མོ་རེ་རེ་ལ་ཡང་ཚིགས་གསུམ་གསུམ་སྟེ་སོར་ཚིགས་སུམ་བརྒྱ་དྲུག་ཅུ་སོགས་བསྒོམ་དགོས་ལ། དེ་ལྟར་བསྐྱེད་རིམ་གྱི་སྐབས་སུ་སྦྱང་གཞི་དང་རྣམ་པ་མཐུན་པའི་དཔལ་དུས་ཀྱི་འཁོར་ལོའི་ཞལ་ཕྱག་ཡོངས་སུ་རྫོགས་པར་བསྒོམས་པས་རྫོགས་རིམ་གྱི་རྒྱུད་སྨིན་བྱེད་དང༌། རྫོགས་རིམ་གྱི་སྐབས་སུ་ཡང་དེ་དང་མཐུན་པར་སྒོམ་པའི་ཐོག་སྦྱོར་བ་ཡན་ལག་དྲུག་གིས་སྟོང་གཟུགས་ཀྱི་སྐུ་སྒྲུབ་ནས་བདེན་དོན་རྣམ་པ་བཅུ་གཉིས་དང༌། དེ་ཉིད་རྣམ་པ་བཅུ་དྲུག་གི་བདག་ཉིད་འབྲས་དུས་ཀྱི་དཔལ་དང་པོའི་སངས་རྒྱས་ཀྱི་གོ་འཕང་མངོན་དུ་བྱེད་པ་ཡིན་ནོ།།
